Heyeta hevbeş a PSK-PWD serdana Encumena Niştîmanî a Kurdên Suriyê kirin

Heyeta hevbeş a Partiya Sosyalîst a Kurdistan-PSK û Partiya Welatparêzên Demokrat-PWD-Kurdistan îro serdana Nivîsîngeha Hewlêrê yê Encumena Niştîmanî a Kurdên Suriyê kirin.

Dengê Azad/Hewlêr

Heyeta hevbeş ku bi Sekreterê Giştî yê PWD Nîzamettîn Taş, Endamên Serkirdayetiya PWD Ebûbekîr û Serhad, Sekreterê Giştî yê PSK Mesûd Tek,  Nunerê Dihokê yê PSK Bedo Xarpêtî, Endamê PSK Azad Diyar, Serokê KOMKAR-EU Kovan Amedî ve pêkhatibûn, ji aliyê nunerên Hewlêrê yê Encumena Niştîmanî a Kurdên Suriyê Dr. Mahmûd Erebo û Bavê Sebir ve bi germî hatin pêşwazîkirin.

Di hevdîtinê de behsa serhildana gelên Suriyê, beşdariya Kurdên Rojavayê di vê serhildanê de û armanc û biryarên Kongra Niştîmanî a Kurdên Suriyê bi taybetî û hevahengiya rêxistinên Kurdistanî bi giştî hate kirin.

Hevdîtina ku qasî seatek domkir, behsa giringiya rola Kurdên Rojavayê di tekoşînên parçeyên din yên Kurdistanê de bi bilindî hate nirxandin.

Nunerên Encumena Niştîmanî a Kurdên Suriyê piştgiriya siyasî û nasandina encumen di bîrûrayên Kurdistana Bakur de ji rêxistinên Kurdistan a Bakur xwestin.