ŞEHÎDÊN HEWLERÊ HATIN BÎRANÎN,
QETLÎAMA QAMÎŞLO HAT PROTESTOKIRIN

STOKHOLM 13/03/2004- Îro li paytextê Swêdê Stokholmê, ji bo bîranîna çileya şehîdên 1-ê sibatê xwepêşandanek hat lidarxistin. Bi sedan kes, li meydana nav bajêr (Sergelstorg) kombûn û careke dî kareseta terorîstî ya ku li Hewlerê li dijî xaniyên PDK û YNK hatibû kirin, rûreş kirin. Sernavê komîteya hevbeş ya herdu partiyan, YNK û PDK  gotar hatin xwendin. Li ser navê partiyên swêdî ji parlamenterên dostên kurdan beşdar bûn û pitgirîya xwe ji bo gelê kurd nîşandan. Herweha li ser navê Komîta Hevkariya Hêzên Siyasî jî gotarek hat xwendin. Li ser navê Platformê û Federasyona Komeleyên Kurdistanê li Swêdê Keya Îzol bi zimanê swêdî gotarek xwend. Îzol di gotara xwe da balkişande ser qetliama Qamîşlo û siyaseta dewleta Suriyê mehkum kir.

LI DIJÎ QETLÎAMA LI KURDISTANA SURIYÊ

Mîtînga ku tenê ji bo bîranîna şehîdan û ji bo rûrşkirina terorîzmê hatibû amadekirin, her di cî da bû xwepêşandanek li dijî qetlîama Qamîşlo û êriş û bûyerên dawî li bajarên Kurdistan Suriyê. Li meydana xwepêşandanê, li ser wan bûyeran agahdarî  hatin dayîn. Li gor agahdariyên dawîn  bajarê Qamîşlo di mehserê da ye, ordî û polêsên Suriyê, hatin û çuyîna nav bajarê Qamîşlo qedexekirine, der dorê bajêr bi tank û çekên giran hatiye pêçandin. Heta niha şer di navbera wan û gelê kurd da dewam dike. Bi kêmanî 18 kes ji kurdan hatine kuştin û bi sedan birîndar hene. Beşdarên xwepêşandana Stokholmê,  ji meydana nav bajêr heta ber sefareta Amerîka meşiyan. Li dijî hukumeta Suriyê, li dijî qetilkirina kurdan û ji bo azadiya gelê kurd slogan hatin bangkirin. Li ser navê beşdarên çalakiyê  sê kesan daxwaznameyeke mişterek hildan û birin sefareta Amerîka. Di nameyê dehwa alikariya Amerîkayê û Milletên Yekbûyî hat kirin da ku neheqiya ser gelê kurd li Kurdistana Surîyê bibînin û rejima şoven û kevneperest ya Suriyê mehkûm bikin. Piştî ku name gihandin sefaretê, bi sloganên rûreşkirina rejima Suriyê kombûn gihîşt dawiyê.