Konsera Şivan Perwer Li Bajarê Goteborgê

Di roja 22 sibatê 2002 an de li bajarê Goteborgê konsera Şivan Perwer çêbû. Şev bi bi deqeyek rêzgirtin ji bo şehîdên Kurdistanê ve vebû. Gotarbêjê şevê li ser navê amadekarê şevê KOMKAR-Swêdê, di despêka şahîyê de sipasî Kurdistan TV kir, ji bo ku îlana vê şevê çend caran di Kurdistan TVê de hatibû belavkirin. Her usa sipasîya dost û hevalên ku di amadekirina şevê de, piştgirî û alîkarîyên xwe pêşkeş kiribûn kir.

Gotarbêjê şevê, di warê çapemenî û ragîhandina Kurdî, bi taybetî jî di heqê GEL-AGê de agahdarî da beşdarên konserê. Wî li ser rola hunermend Şivan Perwer jî qise kir, bi taybetî jî di prosesa geşbûna hestên netewî de, bi stranên xwe yên şoreşgerî û welatperwerî xizmeta hunermend anî ziman.

Hunermend Şivan Perwer, bi stran û awazên kurdî yên ji hev xweştir, şev gelekî xweş kir û beşdarên konserê ji bo şevekî be jî, ji xeman dûr xist û dilê wan geş kir. Şev bi her ewayî bi rêk û pêk bû. Li dora 500 kesî beşdarî şevê bûbûn.Şahî bi disîplînekî baş dest pêkir û bi xweşî jî derbas bû.