| |
|
Vengê bêvengîye
|
|
2014-12-09 19:56
|
|
İlhami Sertkaya
|
|
|
Ez, vengê bêvengîye ra hes kena.
A bêvengîya ke, dima venganê qefelîyayen de, xo azna vengê neweyan vetene.
Dima na bêvengîye de, vengê neweyî vecîne.
Na bêvengîye, zê trêna vineteya ke, seba ke raywanan biresno cayanê xo, şukan de, şeheran de, dewan de, kêyeyan de vila bikero.
Na bêvengîye, koyê ke tarî de vinete yê û nêasnenê, seba ke biasê, roştîya roje ra pawenê.
Na bêvengîye, zê şewe ya, vengê ke roje de peyda bîyê, sixletîye ra vecîyê, qefelîyê.
Na, zê bêvengîya bê peynîye, zê bêvengîya awa golan nîya.
Na, zê bêvengîya awa çeman a ke, qulxaneyê masuyan de, seba masuyê neweyan tayê pawena, sixletîya masuyan ra dime, reyêna herekîna.
Waxto ke herekîna, dilopê ke ci ra visînê, qedînê. Ê dilopî helînê, benê zuya, qîmetê xo nêmanena.
Tayê însanî zî, zê na dilope yê.
Herekîyayê rastîya xo ra visînê, qedînê.
Ê yê ke zonê xo estê, zonê xo qisey nêkenê, zê nê dilopan ê.
Qedîyê.
Ez qalê na bêvengîya ke qedîya, endî ci ra veng-vaj nêvecîno, nêkena.
Ez, na bêvengîye ra hes nêkena, çi ke na, bêvengîye nîya, no, qedîyayîş o.
Neweşî, neweşxane de benê tedawî , benê weş.
Neweşîye ke bêderman bo, neweşî mirenê.
Merdena zaf xirabê na wa ke; dermanê nêweşîya xo estê, la derman nêkenê, tedawî nêbenê.
Na, merdena zaf xirab a.
Zonê însanî esto, însan ke zonê xo nêmiseno, qisey nêkeno, zê nê nêweşan ê.
Ê nêweşê ke dermanê xo estê, la xo derman nêkenê.
Û mirenê, qedînê.
Bi zaneye qedînê, ver bi çiman de qedînê.
Çi ke; asîmîlasyonî, înan ruh ra, mezge ra teslîm girewtê.
La çîyo ke mi ra zaf ecêb o, nê kesî, qalê ‘dermanê asîmîlasyonî ‘ kenê, ê bi xo zî, ‘xo derman nêkenê’
Se kenê?
Bi zonê asîmîlasyonî, ‘pila-pile’ kenê.
Tew!
‘Gulê memire wisar yêno’!
|
|
|
|
|
|