2024-03-29
Skip Navigation Links
Destpêk/Anasayfa
Pêwendî/İlişki
Lînk
Skip Navigation Links
Video
Album
Arşîv
İlhami Sertkaya
 
HER ÇÎ HEWN BÎ, HER ÇÎ ZUR BÎ!
2015-04-20 19:32
İlhami Sertkaya
Yew roja payîzî bî, tanya tîje, Dinya ser o, germîya xo ya hamnanî antbîye, honik bî. Koyî, dewî, rayîrî, sey rîyê domananê ke şên û şênatîye ra, keyf û kay ra visîyabîy, bi çimanê xoyê girsî, ecêb û şaşîye de pawetin bîy. La kamî, çikî, çi pawetêne, nêzanitêne. Vengê cemseyê eskeran, zime û neqebeyan ra, zimîyêne.

Ez, yew rojêde nîyanêne kewta raye. Şukan ra, şeheran ra, şênatîye ra, maye û pîyê xo ra, wayî û birayanê xo ra, der, cîran, nas û hevalanê xo ra visîya, nika tik û tenya sêneyê koyan ê ke bêveng ê, tik û tenya ya. Herb dest kerdbî ci, herbo ke xora ma pawetêne, zanitêne ke yêno. Coka ke, ez bi xo na şaş menda, ne zî seba mi çîyêde xerîb, çîyêde suprîz çînî bî. Merdena ameyabî nêzdîyê ma.

‘Çiman ser’ mi vatê xo bi xo.

Adiran de vîyarta, çemberê eskeran de vîyarta, tarîyan û mixenetîye ra vîyarta, vêşan û têşan menda, cemedîya, rastê vergan û heşan ameya, bê hewn menda, dirbetin bîya, ebe paçan gonîya xo da vinetene, xo bi xo bîya doktorê xo, dîyaxan dêne xo.

Şima zanenê; fekê mi ra qet kilamî kemî nêbîyêne, zerreyê mi ra qet moral nêqedîyêne.

Gelo no dîyax û na şênatîye, meydanê no herbo ke îmkan û quwetê dişmenî mi ra, ma ra hazar qat zêdebî kotî ra ameyêne zerreyê mi?

No moralo girso ke dişmenî pê şaş mendêne, kotî ra ameyêne zerreyê mi?

Helbet omid ra.

Omid estbî. Omidê dawa serbestîya welatê ma.

Omidê dawa serbestîya kamîye û ziwanê ma.

Na dawa de, merdene ‘çiman ser’ ma vatê.

Koyan ra adir vara, dewan ra adir vecîya, zîndanî bîy pir, çewres hazar kes merd.

Kêyeyî, dewî vila û wêran bîyî, bi mîlyonan însanî ebe perîşanîye welat teriknayî, metropolanê Tirkîya û welatanê bînan de vila bîyî. Ez bi xo, seba ke her çî seba ke herbî bî, qebul kerdêne mi qet yew deqa ne ‘ax’ kerd ne zî ‘wax’.

Na ameyîme na roje!

Nika ma vênenîme ke, no herb, na perîşanîye, na vila bîyene, ebe sîyasetêde ecêb, ameyo fekê entegrasyonî.

Entegrasyono ke seba ey, qet nê bîyerî, na perîşanîye luzum nêkerdêne.

Nika se ke ez hewnê hîris serre der a, nê hewnî de hasar bîya, henî yo.

Gelo no hewn bî? Ax ke hewn bîyêne, ax ke nê bîyerî pêro zur bîyêne. La çi heyf ke rast bî. Rastîya tuje, rastîya ke mordemi kena xan û xirabe.

Ez , nika xan û xirabe ya. Armancê ê bîyeran, zur bî çi heyf!

Ne ziwan, ne kamîye, ne azadîya welatî, ne serbestîye!

Ma ra, rastîya ke deje tede vecîna mend.

Ma ra çîyê nêmend!

Kêyeyê felege bivêşo, kêyeyê sîyasetî bivêşo, kêyeyê mixenetîye bivêşo!

Bedelê nê herbî; entegrasyon mêbîyêne!

Bedelê na handayê cefekar û fedekarîye; hal û merhaleyê na ‘virt û vale’ mebîyêne.


De nika...

Nika tasê awa serdine bişimê, şorê ‘derdê xo Sirri Sureya Onderan ra vajê’! O zî ebe şima buhuyo.

DHP yî kamê ke peyda kerdê, şorê ebe înan bixapîyê, ê zî ebe şima buhuyê, vajê; ‘demokratîk Tirkîya, halkların kardeşlixî’.

Nika kayê weçînitîşî esto, parlementoyê Tirkan, sandalî, rutbe, pere, henî bîyo weş ke! Qet qal mekerê.

Nê’rro kamî vatbî ‘ ez nînan pêrune, dewleta Tirkî ra girê dana’?

Henî zî keno.
Rastîye qebul bikerê, rastîye ra meqarîyê keko!
Tasê awe bişimê û zê pepugî vajê; KAMÎ KERD? Mİ KERD’.

Print